Siglir tar il cuntegn

Header

Navigaziun

In bab dat da mangiar a ses pop pitschen.
Legenda: L'iniziativa «Per in congedi da paternitad raschunaivel» vul quatter emnas congedi. Keystone
cuntegn

Nagin time-out pli lung Cussegl federal di NA a 2 emnas congedi da paternitad

Suenter ch'il Cussegl federal ha refusà l'iniziativa «Per in congedi da paternitad raschunaivel» che pretenda quatter emnas congedi per babs, na sustegna el era betg la cuntraproposta indirecta a l’iniziativa che pretenda in congedi da duas emnas.

Il Cussegl federal scriva, ch'el refusa la cuntraproposta indirecta causa autras prioritads en la politica da famiglia: Concret scriva el dad offertas da tgira per uffants dasper la scola e la famiglia. Era vul il Cussegl federal introducir in congedi per geniturs dad uffants ferm malsauns. Tar quellas mesiras saja l'equiliber tranter custs e niz pli grond, scriva il Cussegl federal. Las firmas duain pudair decider sezzas, co ch'ellas vulan reglar in pli lung congedi da paternitad, sch'ellas vulan in tal.

Suenter ch'il Cussegl federal aveva decidì da refusar l’iniziativa per in congedi da quatter emnas per babs, ha la cumissiun sociala dal cussegl dals chantuns fatg la cuntraproposta indirecta da duas emnas congedi. Approvada è quella era vegnida da la cumissiun correspundenta dal cussegl naziunal.

L’iniziativa sco era la cuntraproposta indirecta vegnan sco proxim tractadas dal Cussegl dals chantuns en la sessiun da stad.

RR novitads 17:00