Siglir tar il cuntegn
Inhalt

Svizra Nagina basa legala per survegliar preventiv moscheas

Survegliar a moda preventiva tut las moscheas ed ils imams en Svizra per quai na dettia nagina raschun na era nagina basa legala. Era betg cun la lescha d’infurmaziun nova, ha ditg Markus Seiler schef dal servetsch d’infurmaziun en Svizra envers la «Aargauer Zeitung».

Ina camera da surveglianza.
Legenda: Ina camera da surveglianza. Keystone

Seiler ha avertì da vesair ils schabetgs en la moschea d'An-Nur a Winterthur sco in «cas unic» en Svizra. Talas raits concentradas sco a Winterthur dettia quai en tut las regiuns da la Svizra, ha ditg Seiler en ina da sias raras intervistas. La mesemna era vegnì fatg ina razzia en la moschea An’Nur a Winterthur. Quai suenter che l'imam aveva appellà a mazzament. La moschea era gia pliras giadas dada en egl en connex cun giuvenils radicals e cun persunas ch’eran partidas en Sira per cumbatter cun il stadi islamic.

Servetsch d’infurmaziuns na vul betg controllar las massas

La lescha nova d’infurmaziun entra en vigur l’emprim da settember 2017. Cun la lescha nova d’infurmaziuns èsi pussaivel ch’ina persuna po vegnir survegliada senza ch’ella sa quai, ha ditg Seiler. Ma quai sulet sche quai dat in suspect da terror, da spiunadi ni suspect sin armas da destrucziun en massa, en tut ils auters cas betg. Era cun la lescha nova na det quai nagina surveglianza da massa, ha accentuà Seiler.

RR novitads 12:00