Svizra - Nagina cumissiun parlamentara per dumondas linguisticas - Novitads

Svizra Nagina cumissiun parlamentara per dumondas linguisticas

Nagina cumissiun parlamentara per dumondas da lingua. Il Cussegl naziunal ha ditg na a la moziun dal cusseglier dals chantuns grischun, Stefan Engler. El vuleva ina cumissiun federala per sustegnair il Cussegl federal en dumondas da lingua.

Autur: Fabia Caduff

Stefan Engler vuleva rinforzar la politica da linguas sin livel federal cun ina cumissiun. Far part da la cumissiun per dumondas linguisticas avessan mintgamai trais represchentants da las quatter linguas naziunalas sco era trais represchentants d’autras linguas discurridas en Svizra (p.ex. portugais u englais).

Linguas duajan vegnir sustegnidas, dentant betg cun ina cumissiun. Ina tala na basegnia quai betg ha decidì il Cussegl naziunal cun 100 encunter 80 vuschs e duas abstenziuns. Vinavant haja la Confederaziun gia oz experts en ils departaments pertutgant las dumondas da lingua.

Jau sun dischillus. Tenor mai meritan las linguas minoritaras dapli pais en la politica.

Autur: Stefan Engler Cusseglier dals chantuns PCD

audio

Bunura: moziun Stefan Engler per cumissiun per dumondas da la lingua

ord Actualitad dals 11.12.2017.

laschar ir. Durada: 2 minutas 24 Secundas.

En la sessiun d’atun aveva il Cussegl dals chantuns anc ditg gea a la moziun dad Engler. Però cun il «na» dal Cussegl naziunal è la moziun giud maisa.

La cumissiun per dumondas linguisticas fiss stada ina plattafurma, nua ch'ils commembers avessan pudì sa barattar e perfin cussegliar la Confederaziun. Exempels concrets fissan cura ch'i va per la dumonda da l'englais u franzos en scola u era per la promoziun da las linguas minoritaras en Svizra.