La citad da Berna na tolerescha gievgia saira naginas demonstraziuns nunlubidas. Las autoritads ed ils organisaturs che vulan demonstrar cunter las mesiras da corona n'èn betg sa cunvegnids. Las organisaziuns «Mass-Voll» e «Freiheitstrychler» han uss appellà en las medias socialas a lur aderents da restar a chasa. I fetschia dapli senn da spargnar las forzas per la demonstraziun planisada sonda ad Uster.
Las escalaziuns da la gievgia passada a Berna han ils organisaturs condemnà cleramain. Perquai ch'i ha er dà appells per ina cunterdemonstraziun, è Berna confruntà damaun la saira cun gist duas demonstraziuns nunlubidas.
Tenor Reto Nause, directur da segirezza da la citad da Berna, hajan ins contractà pliras uras cun ils organisaturs da la demonstraziun. Ins saja partì dal fatg ch'i saja vegnì anflà ina schliaziun. Mardi saira hajan ils organisaturs dentant refusà la cunvegnientscha. La citad da Berna avess lubì ina demonstraziun sin il plaz da la Confederaziun sch'ils «Freiheitstrychler» avessan dumandà lubientscha.
