Siglir tar il cuntegn
cuntegn

Svizra Nagina «guerra economica»

Il president da la Confederaziun ha dubis che la Svizra vegn svelt perina cun l'Uniun europeica davart ina nova cunvegna da basa.

Dus politichers.
Legenda: Cusseglier federal Ueli Maurer sin visita tar il chancelier austriac Sebastian Kurz a Vienna. Keystone

Cusseglier federal Ueli Maurer ha avertì dad ina «guerra economica» cun Brüssel. Quai sche l'Uniun europeica na renconuschia betg l'equivalenza da la bursa svizra. En pli ha il president da la Confederaziun crititgà ch'i na dettia actualmain nagins contacts persunals cun Brüssel.

Elecziuns en Svizra ed en UE il 2019

Maurer ha fatg attent ch'i dettia quest onn elecziuns tant en l’Uniun europeica sco er en Svizra. El pretenda perquai dapli pazienza da l'UE. Quai malgrà che la Svizra haja gia strapatschà quella. Dentant ha Maurer er suttastritgà ch'i saja la via fallada da far squitsch sin la Svizra. Quai en vista a l'ultimatum che l'UE ha dà a la Svizra. Brüssel ha dà temp a la Svizra enfin mez da l'onn d'acceptar u da refusar la cunvegna da basa. En pli ha Brüssel sclaus da pudair negoziar anc ina giada davart il cuntegn dal sboz.

Il sboz da la cunvegna da basa tranter la Svizra e l'Uniun europeica ha il Cussegl federal tramess en consultaziun. Questa dura fin mez da l'onn.

RR novitads 17:00