En Svizra na vegnia betg a dar ina immunitad collectiva per covid-19. La rata d'infecziun saja enturn 10%. I saja impurtant da chattar las persunas infectadas ad ura e metter quellas en quarantina, ha ditg Daniel Koch avant las medias en Chasa federala. Che l'emprima runda giaja a fin haja cunzunt da far cun il cumportament da la populaziun. Quella haja mussà chapientscha e disciplina, ha ditg Daniel Koch.
Il trend mussa engiu – ma las reglas valan vinavant
Ord vista epidemiologica saja tut sin buna via. Il dumber dals tests positivs, d'ospitalisaziuns sco er da mortoris sa sminueschian vinavant. Tuttina stoppia la populaziun restar vinavant attenta:
Igl è fitg cler tge che vala: Tschintg persunas èn il maximum. Dapli persunas – che na tutgan betg tar ina famiglia – na dastgan betg s'inscuntrar. La regla da tegnair distanza vala er sche pli pauc che tschintg persunas s'inscuntran. Quai è la lescha vertenta.
En vista als firads che spetgan ha Daniel Koch ditg ch'i valia vinavant da respectar las mesiras d'igiena e da distanza per ch'i na dettia nagin bumerang. La populaziun duaja però giudair la bell'aura. En vista als servetschs divins ha Koch ditg ch'il Cussegl federal sappia da la problematica e che lez vegnia a s'exprimer cura ch'i saja inditgà.
Demonstrar en tschintg è lubì
La Confederaziun ha adattà las reglas che valan per demonstraziuns ed activitads politicas. Da nov na valian demonstraziuns cun tschintg persunas betg pli sco occurrenza ed uschia sajan talas da principi puspè lubidas, ha declerà l'Uffizi da sanadad a las medias en Chasa federala. La distanza minimala tranter ils participants stoppia però vegnir resguardada. Ulteriuras schluccadas ed adattaziuns stoppia però il Cussegl federal decider. L'ultim temp avevi dà pliras denunzias pervia da demonstraziuns encunter las mesiras da corona.