La realisaziun da l’iniziativa da pedofils prevesa che persunas creschidas che han commess delicts sexuals cun persunas minorennas survegnan independent da las circumstanzas evident in scumond da lavurar cun uffants. Sulet prevesa il Cussegl federal da far tschertas excepziun tar uschenumnadas «amurs da giuventetgna».
Scumond da luvrar cun uffants per vita duranta
Il scumond da lavur cun uffants vala era per lavurs voluntarias cun uffants, sco trenaments d’equipas da juniors, ni activitads culturalas cun uffants, scriva il Cussegl federal en sia communicaziun. La proposta per la lescha nova rinforza la lescha existenta en trais puncts:
- Il catalog da delicts vegn augmentà.
- I basegna betg pli in chasti minimal per in scumond.
- Il scumond da lavur cun uffants vala adina, per vita duranta e per tut las funcziuns, era per funcziuns voluntarias.
Il Cussegl federal vul realisar la lescha cun dus instruments. Per ina cun in extract dal register penal e cun il nov spezial extract duajan patruns da lavur sco era organisaziuns e uniuns pudair verifitgar in pussaivel candidat. Er duajan talas persunas per regla vegnir survegliads e tgirads da l’assistenza da reabilitaziun, scriva il Cussegl federal.
Critica - realisaziun sto esser pli dira
Ils iniziants da l'iniziativa da pedofils n’èn insumma betg d'accord cun la realisaziun proponida dal Cussgl federal. Els renfatschan al Cussegl federal da valitar ils interess dals delinquents sco pli impurtants che la protecziun dals uffants.
Il Cussegl federal refusia da realisar l'iniziativa a moda consequenta, crititgeschan ils iniziants. I valian numerusas excepziuns. Er la pussaivladad d'examinar il scumond da lavurar cun uffants suenter 10 onns refusa il comité. Quel appellescha ussa al parlament da stritgar las disposiziuns excepziunalas.
RR novitads 11:30 / 14:00