L'onn passa è ina pussaivla mancanza d'electricitad durant l'enviern vegnida discutada intensivamain. Uss mussan retschertgas da la «NZZ am Sonntag» ch'igl ha dà tranter il mais october e favrer in surpli d'electricitad. Quai mussian las cifras da l'Uffizi federal d'energia.
Tenor la cumissiun d'electricitad saja la raschun per quest surpli d'electricitad las temperaturas miaivlas. Blera plievgia durant l'atun haja emplenì ils lais da fermada e grazia las miaivlas temperaturas da l'enviern n'hajan ins betg duvrà blera energia per stgaudar.
Envers la «NZZ am Sonntag» ha il president da la cumissiun d'energia Elcom, Werner Luginbühl, ditg che la situaziun saja buna. La bilantscha da commerzi d'energia saja levamain positiva quest enviern. Era l'engrondiment da las energias regenerablas possian ins sentir.
Luginbühl avertescha dentant e di ch'i saja memia baud da tschantschar d'in trend. L'enviern passà hajan ins stuì importar tschintg uras terawatt. La Svizra profiteschia er uss d'ovras atomaras che gidian per garantir la furniziun segira cun energia.
Or da l'archiv: Ca pon ins spargnar energia a chasa?