Siglir tar il cuntegn
cuntegn

Svizra Nagina midada – lescha d’abitaziuns secundaras resta

La lescha federala d’abitaziuns secundaras na vegn betg schluccada. Il Cussegl dals chantuns ha refusà la moziun da Beat Rieder (PCD / VS). La midada avess lubì da transfurmar entirs hotels en abitaziuns secundaras.

Ina vista sur ils tetgs da Laax.
Legenda: Ina vista sur ils tetgs da Laax. Keystone

Cun la moziun vuleva Beat Rieder midar la lescha en favur da la hotellaria. Uschia fiss quai stà lubì da transfurmar entirs hotels en abitaziuns secundaras. Actualmain èsi lubì da transfurmar 50% da la surfatscha.

Midar ina lescha gia suenter 14 mais?

La gronda dumonda en la debatta è stada: Dastga il parlament gia midar ina lescha ch'è ida en vigur pir il schaner 2016?

I na dat nagin motiv daco ch'ins na duess betg midar ina tuppadad en la lescha.
Autur: Beat RiederCusseglier dals chantuns (PCD / VS)

Differents represchentants dals chantuns da muntogna han argumentà che la regla da 50% na fetschia nagin senn: Daco duai in mez hotel render sche l'entir hotel na renda betg, ha dumandà Beat Riederer ed ha discurrì d'ina tuppadad en la lescha.

Sustegn ha il vallesan survegnì dal grischun Martin Schmid (PLD), che ha votà per schluccar la lescha d'abitaziuns secundaras.

Jau sun pront da midar ina lescha che na funcziuna betg.
Autur: Martin SchmidCusseglier dals chantuns (PLD / GR)
La votaziun davart la moziun Rieder en il Cussegl dals chantuns.
Legenda: La votaziun davart la moziun Rieder en il Cussegl dals chantuns. MAD

Martin Schmid ha fatg attent che la construcziun d'abitaziuns secundaras saja franada en las regiuns turisticas. En quest senn hajan ils iniziants cuntanschì lur finamira. I dettia dentant tscherts puncts en la lescha, sco quel da transfurmar 50% da la surfatscha d'in hotel en abitaziuns secundarias, che na fetschian betg senn e quels saja da midar.

In zic tranter sutgas e bauns è stà l'auter cusseglier dals chantuns grischun, Stefan Engler - e quai malgrà ch'el ha mussà tutta chapientscha per l'intent da la moziun.

Probabel datti anc dapli puncts en la lescha che na funcziunan betg en la pratica.
Autur: Stefan EnglerCusseglier dals chantuns (PCD / GR)

Stefan Engler ha concedì ch'i saja stà sia proposta, ch'il Cussegl federal duai preschentar suenter 4 onns in'analisa da la situaziun, per lura pudair adattar tut ils puncts che na cuntentan betg. Pervia da quest dilemma è el la finala s'abstenì da la vusch.

La lescha resta sco quai ch'ella è

Suenter ina debatta engaschada da bunamain in'ura e mez ha il Cussegl dals chantuns refusà la moziun ed è uschia suondà la minoritad da la cumissiun. Cun il resultat da 22 cunter 18 vuschs e 5 abstenziuns è il tema cunquai giud maisa.

RR novitads 11:00