Siglir tar il cuntegn

Header

cuntegn

Svizra Nagina revisiun da la lescha d'alcohol

La lescha d'alcohol na vegn betg revedida. Quai ha decis il Cussegl dals chantuns.

Dapi 3 onns debattescha il parlament davart in sboz per reveder la lescha d'alcohol. Quai senza chattar ina cunvegna en chaussa. La chombra pitschna na crai betg, che questas lavurs mainian ad in resultat cuntentaivel, èsi stà d'udir en la debatta.

Crap da stgarpitsch levgiament fiscal e vendita da notg

Discutà avevan las duas chombras surtut davart levgiar da taglias ils destillaturs da vinars indigens; però era davart in scumond da vender alcohol la notg. Las cumissiuns economicas dad omaduas chombras han perquai proponì a lur cussegls da betg reveder la lescha d'alcohol. Uss duai il Cussegl federal elavurar ina nova lescha.

Il Cussegl federal vul vegnir spert cun ina proposta

La ministra da finanzas Eveline Widmer-Schlumpf ha beneventà questa decisiun sco "sepultura adequata". Ella ha empermess ch'il Cussegl federal vegnia a reprender ils puncts dispitaivels e far ina proposta per mauns dal parlament. I sa tracta da la liberalisaziun dal commerzi cun ethanol e spirituosas e la privatisaziun dad Alcosuisse, ina partiziun da l'administraziun federala d'alcohol.

RR novitads 12:00

Artitgels legids il pli savens