Cun 14 cunter 9 vuschs ha la cumissiun per traffic e telecommunicaziun dal Cussegl naziunal approvà l'iniziativa parlamentara dal cusseglier naziunal Gregor Rutz da la PPS da Turitg. Quai han communitgà ils Servetschs dal parlament. Sco proxim sto la cumissiun dal Cussegl dals chantuns s'occupar da la fatschenta.
I saja da realisar l'empermischun fatga durant las discussiuns da l'iniziativa No Billag, nua che l'incumbensa dal service public vegn definì pli exact e restrenschì. Uschia l’opiniun da la maioritad da la cumissiun. Ultra da quai pajan ils possessurs da firmas ed emploiads gia sco persunas privatas ina taxa.
170 milliuns francs pli pauc
Ils adversaris da l'iniziativa argumenteschan ch'i na saja betg necessari da puspè midar il sistem. Er renvieschan els al fatg che 170 milliuns francs mancassan senza las taxas da las interpresas. En consequenza survegnissan er emetturs da radio e televisiun privats damain daners.
RR novitads 16:00
