Microsoft ha annunzià ch’il support per Windows 10 vegn a finir ils 14 d’october 2025. Quai signifitga: naginas actualisaziuns pli – surtut betg actualisaziun da segirezza. Il sistem operativ funcziuna vinavant, ma l’utilisaziun daventa pli privlusa, spezialmain cun activitads sco e-banking, scriver e-mails u navigar en l’internet.
Tge munta quai concret?
- Windows 10 funcziuna anc, ma na vegn betg pli actualisà.
- Il ristg da virus, malware ed autras smanatschas digitalas crescha.
- Tgi che va online duess prender mesiras.
Tge opziuns han utilisaders?
Actualisar sin Windows 11: Blers apparats pon vegnir actualisads gratuitamain sin Windows 11. Sche quai è pussaivel, mussa quai savens il center d’actualisaziuns (Einstellungen -> Update & Sicherheit). Sche betg, pon ins far in test da cumpatibilitad u sa laschar cussegliar en in affar da computer.
Cumprar in nov apparat: Sche l’apparat è memia vegl, resta savens mo anc la cumpra d’in nov. Per diever simpel sco navigar u leger e-mails bastan savens apparats favuraivels u tablets. Era qua vala: sa laschar cussegliar.
Installar Linux: Tgi che na vul betg cumprar in nov apparat, po midar sin in sistem operativ gratuit sco Linux. Quai pretenda dapli savida tecnica, ma cun agid da persunas dal fatg u instrucziuns online è quai pussaivel.
Mo pli offline u sustegn prolungà: Il computer po vegnir duvrà mo pli offline, pia senza internet, uschia scroda il risico da segirezza. Microsoft porscha er in sustegn prolungà ch'ins po pajar, ma quel è mo per in onn.
