A sia prima sesida suenter las vacanzas da stad ha il Cussegl federal decis da restar tar las mesiras actualas da pandemia. Quai dentant per proteger il sistem da sanadad e pli pauc per proteger persunas che n'èn anc betg vaccinadas. In return a la normalitad saja be pussaivel sch'ins augmentia la cumpart da persunas vaccinadas. Uschia appellescha il Cussegl federal da laschar dar la squitta. Prender mesiras pli severas vul il Cussegl federal pir sch'il sistem da sanadad pudess vegnir surchargià.
Actualmain vala in obligatori da mascras en il traffic public e dadens sco er in certificat per occurenzas grondas e clubs.
Actualmain na datti betg bleras mesiras, e quellas vegnan acceptadas bain da la populaziun.
Nagins tests gratuits a partir d'october per persunas senza sintoms
A partir da l'october na surprenda la Confederaziun betg pli ils custs da testar per persunas senza sintoms. Tgi che vul pia visitar in concert u in'occurenza da sport sto pajar sez ils custs. Be tar persunas che na pon betg sa laschar vaccinar datti excepziuns. Decider definitivamain davart questas mesiras vul il Cussegl federal en duas emnas, las propostas èn uss en consultaziun.
Da la fasa da stabilisaziun en la fasa da normalisaziun
La midada da la fasa da stabilisaziun en la fasa da normalisaziun n'ha uschia naginas consequenzas directas per la populaziun. Las paucas mesiras sco p.ex. in obligatori da mascra en il traffic public restian, quai pervia da la situaziun malsegira actuala. I na saja actualmain betg cler tge effect ch'il return da vacanzas e la viarianta Delta hajan sin la pandemia. Uschia na saja betg da sclauder ch'il sistem da sanadad vegnia a ses cunfins, ha declerà il minister da sanadad Alain Berset.