La dumonda da schanegiar ils purs da scursanidas en il preventiv federal 2016 u betg separa vinavant il parlament a Berna. Il Cussegl naziunal ha approvà per la segunda giada pliras fatschentas che purtassan l'onn che vegn 93 milliuns francs dapli als purs svizzers. Las decisiuns èn crudadas cun cleras maioritads.
Plirs represchentants cunzunt da vart burgaisa han argumentà en favur dals purs. Er gia pitschnas scursanidas muntian ina digren d’entradas per l’agricultura che na saja betg da responsar, han argumentà il cusseglier naziunal lucernais Leo Müller da la PCD, ni er il cusseglier naziunal da la Turgovia Markus Hausmmann da la PPS.
«Schanegiar ils purs è la via fallada»
Per la sanestra è da schanegiar ils purs da mesiras da spargn irresponsabel. Ed er la ministra da finanzas Eveline Widmer-Schlumpf ha argumentà: «Da schanegiar l’agricultura da la generala midada da structura è ord vista da la politica da finanzas la via fallada».
Per cumpensar las expensas supplementaras vul il Cussegl naziunal spargnar 125 milliuns francs tar ils custs da manaschi e da material en tut ils departaments.
Uss è l’emna che vegn puspè il Cussegl dals chantuns al tur da sa fatschentar cun il budget 2016.
RR novitads 12:00