Siglir tar il cuntegn

Header

cussegl dals chantuns
Legenda: 6 chantuns han gì d'eleger questa dumengia en in 2. scrutini lur candidats per il cussegl dals chantuns. Keystone
cuntegn

Svizra Naginas surpraisas tar 2. scrutini

Il segund scrutini per il cussegl dals chantuns n'ha purtà naginas grondas surpraisas. Sulettamain en il chantun Sursilvania gudogna la PCD sin custs da la PLD.

En il Tessin resta tut sco fin qua cun in sez per la PCD ed in per la PLD. En il chantun Lucerna defendan PCD e PLD lur sezs. La PS ha pudì defender ses sezs en il chantun Soloturn e Son Gagl. Er en il chantun Berna n'hai dà naginas midadas. Sulettamain en il chantun Sursilvania gudogna la PCD sin custs da la PLD.

Damian Müller nov en cussegl dals chantuns

A Lucerna han ils Cristiandemocrats ed ils Liberals, las partidas represchentadas enfin ussa, pudì defender lur sezs. Il suveran da Lucerna ha elegì il cusseglier da fin qua Konrad Graber da la PCD e da nov Damian Müller da la PLD. Las cunter-candidatas da la PS e da la PPS n'han gì naginas schanzas.

Dus cussegliers da fin uss per il Tessin

Il Tessin trametta ils dus cussegliers da fin uss en il cussegl dals chantuns. Reelegids èn Filippo Lombardi da la PCD e Fabio Abate da la PLD. Abate ha dentant stuì temair per sia reelecziun, el ha fatg la finala mo 1'600 vuschs dapli ch'il candidat da la Lega, Battista Ghiggia. Ed era Lombardi ha mo cuntanschì in avantatg da 2'000 vuschs sin Ghiggia.

Soloturn: Roberto Zanetti (PS) reelegì

En il chantun Soloturn han ils Socialdemocrats defendì lur sez en il cussegl dals chantuns cunter in candidat da la Partida populara. Roberto Zanetti da la PS ha fatg passa 47'000 vuschs, ses concurrent Walter Wobmann da la PPS var la mesadad. Avant in mais aveva il suveran gia reelegì en l'emprim scrutini Pirmin Bischof da la PCD en il cussegl dals chantuns.

Son Gagl: Paul Rechsteiner defenda il sez da la PS

En il chantun Son Gagl gartegia quai a Paul Rechsteiner da la Partida socialdemocratica da restar en il cussegl dals chantuns. Rechsteiner ha fatg var 20'000 vuschs dapli che Thomas Müller da la PPS. Gia l'october avevan ils da Son Gagl reelegì Karin Keller-Sutter da la PLD.

Sursilvania: PCD gudogna sin custs da la PLD

En il chantun Sursilvania ston ils Liberals far liber lur sez als Cristiandemocrats. Gudagnà l'elecziun ha Erich Ettlin da la PCD cun var 7'500 vuschs, passa 1'000 vuschs dapli che ses concurrent André Windlin da la PLD.

Berna: Luginbühl e Stöckli dumognan reelecziun

Ils cussegliers chantunals da fin qual dal chantun Berna èn vegnids reelegids, sco spetgà. Werner Luginbühl da la PBD e Hans Stöckli da la PS n’han betg gì gronda concurrenza en il 2. scrutini.

RR novitads 14:00

Dapli da Svizraavrir la Landingpage

Nach links scrollen Nach rechts scrollen