Siglir tar il cuntegn

Header

cuntegn

Nagins blessads Tunnel è sballunà en il Vallais sut

Ina part dal palantschieu sura d'in tunnel da via ad Isérables en la vischnanca da Riddes en il Vallais è crudada ensemen la sonda. I n'ha dà nagins blessads. Il tunnel resta serrà per almain plirs mais.

In sviament è vegnì endrizzà. «I n'è betg crudà giu mo in palantschieu da betun», ha ditg in pledader da la Polizia chantunala vallesana a l'agentura da novitads Keystone-SDA. «Il tunnel è vegnì chavà ora en il grip.» Il represchentant da las autoritads ha confermà cun quai infurmaziuns da differentas medias.

Il schef dal servetsch da mobilitad Vincent Pellissier es stà al lieu dumengia a bun'ura. El quinta ch'il tunnel resta serrà almain in mais, «forsa perfin per onns». I stuessan anc dar analisas. Pellissier ha punctuà ch'els sajan amez las Alps. Qua èsi crappa che croda giu ed ultra da quai vegn era l'erosiun natirala vitiers.

Uschè in accident possia capitar dapertut. «Il sistem da surveglianza che nus avain installà pussibilitescha d'avertir nus dapertut nua ch'igl è enconuschent», ha el detg envers SRF.

video
Rapport or da la Tagesschau
Or da Tagesschau dals 04.02.2024.
laschar ir. Durada: 1 minuta 35 Secundas.

Las autoritads partan dal fatg cha las malauras dal december e las temperaturas miaivlas dals ultims dis pudessan avair giugà ina rolla pro la sballunada. Il tunnel è passa 50 onns vegl. El collia Isérables cun La Tzoumaz sur Mayens-de-Riddes. La via maina vinavant a Verbier. I è installà in sviament. Quel n'è però betg charrabel cun vehichels grevs, sco chi'l pledader da la polizia ha ditg.

Artitgels legids il pli savens