La proposta d'auzar las contribuziuns per la furmaziun professiunala sco era la proposta per reducir las contribuziuns han fatg naufragi. La Confederaziun duai sustegnair la furmaziun professiunala cun 3,289 milliardas ils proxims quatter onns, quai ha decis il Cussegl naziunal. Cunquai suonda el al Cussegl federal ed a la cumissiun da finanzas.
Ils adherents d’expensas pli autas han argumentà senza success, ch’i dettia dapli daners per la furmaziun professiunala superiura. Per che quai na giaja betg sin ils custs da la furmaziun da basa, stoppia la contribuziun vegnir augmentada. Fatg naufragi ha er la dumonda da la PPS da scursanir la contribuziun sin 3,283 milliardas.
Per projects per sviluppar la furmaziun professiunala ed la qualitad ha il Cussegl naziunal approvà in credit da 192,5 milliuns, per l'institut federal per la furmaziun in da 150,8 milliuns. Er qua è el suandà il Cussegl federal.
Er betg dapli daners per l'ETH
Er concernent las expensas per la furmaziun è il Cussegl naziunal suandà las propostas dal Cussegl federal. Uschia duai ils proxims 4 onns survegnir la ETH Turitg circa 10,2 milliardas francs. La cumissiun d’educaziun vuleva anc augmentar las contribuziuns per 300 milliuns quai per che l’ETH e la perscrutaziun en Svizra restian a la testa globala. Vinavant ha il Cussegl naziunal decis che l’ETH po pretender pli autas taxas da studi per students dal exteriur. Ellas pon esser fin a 3 giadas pli autas che las taxas per students svizzers.
RR novitads 14:00