Siglir tar il cuntegn

Header

video
Via dal San Bernardino (senza commentari)
Or da News-Clip dals 15.11.2019.
laschar ir. Durada: 47 Secundas.
cuntegn

Naiv nova Privel da lavinas crescha

Il favugn e naiv nova en las muntognas chaschunan privels da lavinas en pliras parts da la Svizra. Cunzunt per il Grischun valitescha l'institut per naiv e perscrutaziun da lavinas SLF in privel da lavinas considerabel fin grond.

En l'Engiadin'Ota, tranter auter en la regiun da Malögia sco era en Bregaglia è il privel grond, stgalim 4 (cotschen). En las grondas parts da l'ulteriur Grischun vala in privel da lavinas considerabel, stgalim 3 (oransch).

Stemprà la notg passada

In stemprà da favugn e vents cun forza d'orcan hai dà en las Alps svizras la notg passada. Diversas valladas da favugn han gì vents da passa 100 km/h.

Il medem temp hai dà plievgia intensiva en il sid. En ils culms hai dà blera naiv nova. Tenor SRF Meteo hai dà las ultimas 12 uras 30 fin 70 cm naiv nova en la regiun dal Vallais sura sur la regiun dal Gottard fin en il Tessin dal nord. En pliras regiuns alpinas regia in aut privel da lavinas, uschia era en l'Engiadin'Ota ed en la Bregaglia.

Stemprà ha bloccà 200 turists

En la Part sura bernaisa ha il stemprà pinà plantas e fatg cuflàs. Ils pli ferms bufs han ins registrà sin il Jungfraujoch cun passa 160 km/h. Pervi dal stemprà han 200 turists ed emploiads stuì passentar la notg sin la Kleine Scheidegg. Blessads n'haja dà nagins ha ditg ina pledadra da las pendicularas. Las 200 persunas hajan ins pudì pernottar en chombras, singulas hajan stuì durmir sin bancs. Il decurs dal venderdi avantmezdi han ins pudì evacuar tuttas persunas.

Las lingias da viafier tranter Lauterbrunnen e Grindelwald e tranter Lauterbrunnen e Mürren èn stadas interruttas.

Naiv en Frantscha

L'enviern è er arrivà en il sidost da la Frantscha, nua che tschient millis da persunas n'han nagina electricitad. Venderdi bun'ura eran 300'000 chasadas en il stgir, sco il gestiunader da la rait Enedis ha ditg envers l'emettur da televisiun franzos BFM TV. I sa tractia d'ina situaziun excepziunala. Passa 1'000 tecnicists emprovian da reparar ils donns. En il sidost da la Frantscha eran numerusas vias serradas pervi da naiv e glatsch. Er diversas scolas èn restadas serradas.

video
Situaziun da naiv en la Frantscha dal sid (senza commentari)
Or da News-Clip dals 15.11.2019.
laschar ir. Durada: 43 Secundas.

RR novitads 11:00

Artitgels legids il pli savens