Siglir tar il cuntegn

Header

cuntegn

Svizra Nathalie Wappler daventa directura da SRF

Il cussegl d'administraziun da la SRG SSR saja suandà unanimamain la proposta da la suprastanza regiunala da la SRG Deutschschweiz ed haja elegì Nathalie Wappler sco nova directura da SRF. Quai communitgescha la SSR.

Nathalie Wappler (50) surpiglia la direcziun da SRF la primavaira 2019. Fin là maina Ruedi Matter (65) l'interpresa. Co che la surdada vegn organisada vegnia definì las proximas emnas ensemen cun il directur general da la SSR Gilles Marchand, scriva la SSR.

Jau hai plaschair da dastgar beneventar Nathalie Wappler en la direcziun generala da la SSR. Sia experientscha, sia savida professiunala e sias enconuschientschas da las relaziuns svizras vegnan ad esser da grond avantatg en questa fasa da transfurmaziun radicala da la SSR e da SRF. Areguard las valurs e las sfidas dal service public essan nus dal tuttafatg d'accord.
Autur: Gilles Marchand directur general da la SSR

Cun Nathalie Wappler turna ina fatscha enconuschenta tar SRF: Fin a sia midada tar il MDR ha Wappler lavurà en differentas funcziuns per SRF. Uschia era ella stada managera da differents projects tar process da midada e suenter manadra da la partiziun Cultura è perquai er commembra da la direcziun generala da SRF.

En sia communicaziun scriva la SSR, che Nathalie Wappler haja persvadì ils commembers da la cumissiun en la procedura da nominaziun betg mo cun sia experientscha da blers onns sin il sectur da medias, mabain era cun sia cumpetenza strategica, sia moda da pensar analiticamain, ses bun nas per las sfidas che spetgan il service public medial e sia chapientscha per ils process e las realitads sociopoliticas en Svizra. Plinavant haja Nathalie Wappler bunas cumpetenzas da manar.

Nathalie Wappler Hagen

Avrir la box Serrar la box

Nathalie Wappler Hagen nascha l'onn 1968 a Son Gagl. Ella terminescha ses studi d'istorgia, scienzas politicas e germanistica ils onns 1990 a l'Universitad da Constanza cun il

Magister Artium. Studis a l'exteriur la mainan a l'Universitad da Bristol en Gronda Britannia ed a l'Universitad da Stanford en California. Ses emprims onns da professiun passenta ella sco redactura tar ARD (WDR), ZDF e sco scheffa d'ediziun tar 3sat. Dal 2005 fin tar la midada tar il Mitteldeutscher Rundfunk MDR il 2016 lavura Nathalie Wappler en differentas funcziuns per SRF.

RR novitads 17:00

Artitgels legids il pli savens