Tenor il cussegl naziunal duai almain il tat u la tatta (ils nons) esser naschì en Svizra, per ch'ina persuna possia dumbrar sco «ester da la terza generaziun». Sche quai saja betg il cas stoppia vegnir «rendì vardaivel» che almain il tat u la tatta hajan gì ina permissiun da domicil en Svizra. Il cussegl naziunal ha dezidì cun 115 cunter 72 vuschs da mantegnair questa formulaziun uschia.
Al cussegl dal stans na tanscha «render vardaivel» betg
Il cussegl dals stans vul che u il tat u la tatta han «possedì ina permissiun da domicil» en Svizra. I sa tractia qua dad ina formulaziun pli clera e pli stricta.
Ils adversaris da questa versiun din, ch'i saja quasi impussibel da chattar ina tala permissiun damai ch'il register dad esters saja electronics pir dapi il 1972. Tenor Balthasar Glättli (verds/ZH) saja ridicul da vulair tals mussaments, sch'il stadi sez gnanc haja quels.
Las ulteriuras cundiziuns
Tar las ulteriuras cundiziuns èn il cussegl naziunal ed il cussegl dals chantuns dal medem maini. In dals geniturs stoppia esser naschì en Svizra ed avair vivì almain diesch onns qua. Plinavant sto in dals geniturs esser ì almain tschintg onns qua a scola.
La dumonda per ina natiralisaziun facilitada duai mo esser pussaivla enfin 25 onns. Uschia vulan ils cussegliers evitar ch'i vegn guntgì il servetsch militar obligatoric.
Cun quai che la constituziun vegn modifitgada per la natiralisaziun da la 3. generaziun datti ina votaziun dal pievel.
RR novitads 12:00