Siglir tar il cuntegn
cuntegn

Svizra Nauschas cartas per l'iniziativa da construcziun dischordinada

Il terren da bajegiar existent duai vegnir nizzegià a moda pli effizienta. La debatta davart l'iniziativa dals Giuvens verds è vegnida lantschada la gievgia en il Cussegl naziunal.

Il Cussegl dals chantuns ha dit na a l'iniziativa cunter la construcziun dischordinada. Il Cussegl naziunal suonda probabel.
Legenda: Il Cussegl dals chantuns ha ditg Na a l'iniziativa cunter la construcziun dischordinada. Il Cussegl naziunal suonda probabel. Keystone

Grondas schanzas na para l’iniziativa dals Verds betg dad avair. Gia en la sessiun da primavaira aveva il Cussegl dals chantuns ditg cun ina gronda maioritad Na a l’iniziativa cunter la construcziun dischordinada. E tenor l’atmosfera durant l’emprima debatta en il Cussegl naziunal vegn l’iniziativa probablamain sbittada en quella chombra. Era la cumissiun pledescha cunter. L’iniziativa saja memia radicala e cun la revisiun da la planisaziun da territori sajan las cundiziuns da basa gia fitg restrictivas ed ils chantuns sajan anc londervi a realisar la revisiun.

Dentant dian ils Verds ch'ins stoppia uss agir. Mintga di vegnia surbajegià in territori che correspundia ad 8 plazzas da ballape. I na possia betg ir vinavant uschia. Il territori che saja gia en la zona da construcziun, duaja vegnir duvrà pli effizient.

La tendenza en il Cussegl naziunal mussa, che l’iniziativa ha in grev stan en la chombra gronda. Sper l’iniziativa è er anc ina cuntraproposta sin maisa: Quella va dentant anc pli lunsch che l’iniziativa e para dad avair anc pli paucas schanzas en il parlament. La discussiun n'è dentant anc betg finida, quella cuntinuescha anc en la sessiun da stad.

Il Cussegl federal sco era il Cussegl dals chantuns proponan da dir Na a l'iniziativa.

Tge vul l'iniziativa

L'iniziativa è vegnida inoltrada ils 21 d’october 2016 cun 113'216 suttascripziuns valaivlas. Ella prevesa che las zonas da construcziun na vegnan betg pli extendidas. Novas zonas da bajegiar duai quai be dar, sch'ina surfatscha da la medema dimensiun e cun ina qualitad da terren cumparegliabla vegn prendida ord la zona.

Qua tras duessi esser pussaivel da cultivar il terren da bajegiar existent a moda pli effizienta. Plinavant prescriva l’iniziativa reglas davart in svilup dals abitadis a l’interiur, quartiers persistents e davart il bajegiar ordvart la zona da bajegiar.

RR novitads 12:00