Il chantun Grischun fixescha mintg'onn ina paja directiva per l'economia d'alp. Uschia duai in signun gudagnar almain 170 francs per di. Ma la fin finala dastgan ils purs decider sezs quant ch'els pajan. Ina statistica quant ch'il persunal d'alp gudogna na datti betg en il chantun Grischun.
Dumping da paja sin las alps svizras
Curdin Foppa dal Plantahof è dal maini che per 90% dettian ils purs la paja directiva. Il sistem actual saja il pli ideal, manegia Foppa. Ina paja flexibla resguardia era l'experientscha da la persuna che lavura sin l'alp. Tgi che vegn l'emprima giada n'haja betg tanta experientscha e duai perquai era betg survegnir tant sco ina persuna che ha già passentà pliras stads sin l'Alp. Il president da l'Uniun purila grischuna, Thomas Roffler, è persuenter d'introducir ina paja minimala per il persunal d'alp.