Radund 150 emprims sutsegnads e bun 30 organisaziuns sustegnan il giavisch. Il lieu commemorativ duai daventar in lieu d'intermediaziun e colliaziun. Surtut duai la generaziun vegnenta vegnir animada ad ina reflexiun critica davart pregiudizis ed exclusiun, scrivan ils iniziants suenter la surdada dal concept. Passa 1'000 umans cun ina relaziun cun la Svizra han stuì supportar las sgarschurs d'in champ da concentraziun, passa 200 dad els èn vegnids mazzads là.
Perditgas da quests delicts da sgarschur moran plaunet. Perquai saja impurtant che la Svizra survegnia cun il «Memorial svizzer» in lieu da commemoraziun e da discurs, uschia ils iniziants.
Sut il motto «regurdar, intermediar, colliar» duai il memorial daventar in lieu commemorativ en il spazi public a Berna. El duai render onur a tuttas unfrendas dal naziunalsocialissem: Persequitads, persunas privadas da ses dretgs, mazzads, Gideuas, Svizzers, minoritads, opponents sco er als fugitivs ch'ins ha refusà al cunfin. Ins vul dentant er regurdar a las persunas che han gidà a las persunas persequitadas.
Grond sustegn
150 persunalitads, sco per exempel l'anteriura cussegliera federala Ruth Dreifuss, l'autur Pedro Lenz u il cineast Markus Imhoof, sustegnan il project. Il plan vegn er beneventà tar las ultimas surviventas sco per exempel Vera Rottenberg. Ella, sia mamma e sia sora han pudì fugir il 1944 da l'Ungaria en Svizra grazia al sustegn dal secretari da l'ambassada Harald Feller.