Il concern da mangiativas Nestlé ha cumenzà il 2015 cun in zic dapli svieuta. Sco quai ch'il concern svizzer scriva saja quella creschida ils emprims trais mais da l'onn per 0,5% sin bunamain 21 milliardas francs.
La raschun per las cifras positivas sajan en emprima lingia ils augments dals pretschs. Ina gronda part saja però vegnida absorbada dal ferm franc svizzer. Tuttina hajan ins pudì crescher en tut las regiuns. Il pli grond augment saja però vegnì nudà en l'Europa, il Proxim Orient e l'Africa dal nord.
