«No Billag»: schanza u mort per novitads regiunalas?

34 emetturs da radio e da televisiun privats survegnan daners ord la cassa da la Billag. Quai èn emetturs da radio e da televisiun en las regiuns. Uschia possian vegnir garantidas a la populaziun las novitads regiunalas. Tge capita senza Billag? Schanza u mort?

En la dumonda sco la situaziun da medias duai guardar ora en las regiuns gioga l’iniziativa da la «No Billag» ina rolla. Ils ins teman per las novitads regiunalas ed ils auters vesan ina schanza.

Sco Markus Horst, il co-president dal comité da «No Billag». Il martgà duai regular la diversitad di el. El saja persvas, ch'il martgà vegni era ad investir en las regiuns.

«  Las regiuns pon mo gudagnar cun l'iniziativa da la «No Billag». Il martgà liber vegn a regular il martgà da medias e mantegnair la diversitad. »

Markus Horst
Co-president dal comité da l’iniziativa «No Billag»

Impussibel contra il cusseglier naziunal da la PCD e directur da la gruppa svizra per las regiuns da muntogna Thomas Egger. Ils emetturs en las regiuns sajan dependents per part fin sur 50% ed auters perfin per ¾ dals daners da la Billag, quai apunta perquai che na giaja betg da surviver sulet cun reclama.

«  L'iniziativa «No Billag» periclitescha l’existenza dals emetturs da radio e da televisiun en las regiuns. Quai fiss la mort per novitads regiunalas. »

Thomas Egger
Directur Gruppa svizra per las regiuns da muntogna

Thomas Egger tema, ch'il martgà vegnia centralisà. Mo là nua ch'i rendia vegnia investì e quai na sajan betg las regiuns. Uschè patescha la diversitad da medias. Però dementescha Markus Horst, i saja adina meglier ch'il martgà sa reguleschia da sasez. Uschè dettia qua adina dapli players quai sa mussia era en autras branschas.

En ina èn dentond èn omadus perina: tuts dus vulan ina gronda schelta, ina diversitad ed ina auta qualitad da medias. Mo ch'in di che quai vegn cuntanschì mo sche la «No Billag» vegn acceptada e l’auter di che precis quell’iniziativa saja la mort per novitads regiunalas.

RR actualitad 12:10