Siglir tar il cuntegn

Header

cuntegn

Notg da Silvester Pliras acziuns da pumpiers e polizia a Cuira

La notg da Silvester èn ils pumpiers e la polizia adina puspè stà en acziun. A Cuira hai dà pliras acziuns pervi da pitschens fieus. Tschintg giadas era la polizia ensemen cun ils pumpiers en acziuns pervia dals incendis, sco per exempel en in moloc u sin in balcun. Quests han ins pudì stizzar svelt, dentant hai dà donns da material. Plinavant haja era dà reclamaziuns, perquai che persunas hajan laschà ir fieu artifizial en il lieu fallà. Quai scriva la polizia da la citad da Cuira.

Ultra da quai hai dà plirs telefons ord quartiers d'abitar pervia da canera u che la polizia ha stuì entrar en acziun pervia d'alcolisads, acts da violenza u ulteriur agid.

Passa 100 intervenziuns a Son Gagl

La notg da Silvester era la polizia adina puspè en acziun. La polizia chantunala da Son Gagl discurra da dapli intervenziuns la notg passada, cumpareglià cun auters onns. Passa 100 intervenziuns haja dà, e zunt savens en connex cun fieu artifizial. Passa 10 incendis eran pervia da rachetas u auters objects pirotecnics.

Pli pauc incaps en Turgovia

Era en la Turgovia hai dà in pèr incendis e donn da material pervia da fieus artifizials. Denant discurra la polizia d'ina notg senza pli gronds incaps. Radund 20 annunzias hai dà tar la polizia pervia da disturbi da ruaus, donn da material u maldiever da fieus artifizials.

Grond fieu artifizial a Turitg per gronda part paschaivel

A Turitg è il grond fieu artifizial da Silvester passà per la gronda part paschaivel, annunzia la polizia da la citad. Pliras 10'000 persunas sajan stadas al lieu da la festa. Dentant han visitaders adina puspè laschar ir rachetas amez la fulla.

audio
Per tadlar: las novitads da las 11:00
ord RTR Audio dals 01.01.2023.
laschar ir. Durada: 2 minutas 24 Secundas.

RTR novitads 11:00

Artitgels legids il pli savens