Siglir tar il cuntegn

Header

video
La Viafier retica lantscha ina nova app
Or da Telesguard dals 28.04.2016.
laschar ir. Durada: 2 minutas 28 Secundas.
cuntegn

Svizra Nov'app duai simplifitgar il viadi cun meds publics

Ir cun bus u tren senza bigliet, quai va. Bunamain. Las interpresas da transport dal Friburg (TPF), Lucerna (vbl) e la Viafier retica han lantschà l’app cun il num «Fairtiq» che duai simplifitgar il viadi cun il traffic public.

Nagut nov: Tgi che viagescha cun meds publics sto cumprar in bigliet avant il viadi. Nov: Las interpresas da transport dal Friburg e da Lucerna vulan en cooperaziun cun la Viafier retica midar quest model.

Ensemen cun il partenari Fairtiq AG han las trais interpresas sviluppà e lantschà l’app «Fairtiq». La finamira è tenor in communiqué betg main che da «revoluziunar» il viadi cun il traffic public.

Co funcziuna questa «revoluziun»?

L’app basescha sin il princip CIACO (Check In, Assisted Check Out). Quai munta cun auters pleds: Il passagier avra l’app cura ch’el va en in vehichel da transport public sco bus, tren u tram. L’app localisescha lura automaticamain, nua ch’il passagier viagescha. A la fin dal viadi sto l’app be pli vegnir serrada.

Quant custa mes bigliet digital?

Las interpresas scrivan che l’app metta a quint al passagier il bigliet il pli bunmartgà. Il pajament succeda via carta da credit u via quint da telefon. Sch’in passagier emblida da serrar l’app a la fin dal viadi, lura regorda l’app automaticamain da serrar ella (Assisted Check Out). Per duvrar l’app sto l’utilisader sa registrar ina giada.

audio
Nova app che remplazza il bigliet da tren
ord Actualitad dals 28.04.2016.
laschar ir. Durada: 1 minuta 40 Secundas.

Introducziun en trais regiuns

En in’emprima fasa pon passagiers da suandantas zonas da tariffas coordinadas utilisar l’app, numnadamain:

  • Frimobil (chantun da Friburg)
  • Passepartout (chantuns da Lucerna, Sur- e Sutsilvania)
  • Engadin Mobil (Engiadin’Ota)

Dentant vulan las interpresas da transport dal Friburg, da Lucerna e la Viafier retica er introducir il servetsch da (u senza) bigliets en l’entira Svizra. Discurs correspundents hajan gia cumenzà.

RR novitads 14:00 / Telesguard dals 28.04.2016

Artitgels legids il pli savens