Las organisaziuns per la protecziun da l'ambient, Aqua Viva e Grimselverein, fan recurs cunter il lai da fermada da Trift planisà en la Part Sura Bernaisa.
Las ovras electricas Oberhasli vulan construir sut il glatscher da Trift in nov mir da fermada per radund 450 milliuns francs.
Aqua Viva e Grimselverein han annunzià la gievgia, ch'ellas vegnian a contestar la concessiuns per las ovras electricas Oberhasli. Il CEO da las ovras Daniel Fischlin quinta che quai process vegnia a cuzzar almain dus onns.
Las organisaziuns fan recurs perquai ch'il niz da la nova ovra saja pitschen, cumpareglià cun la perdita da la natira e la cuntrada. La valur ecologica dal territori na vegnia betg resguardada.
Che quel saja degn da vegnir protegì, saja vegnì cumprovà ils davos trais onns. El adempleschia er ils criteris per l'inventari da regiuns umidas degnas da protecziun da la Confederaziun.
58 spezias d'insects d'aua perdessan tenor las organisaziuns lur spazi da viver. Duas da quellas èn sin la glista cotschna da spezias periclitadas da murir ora.
L'ovra da Trift duai cunzunt furnir electricitad l'enviern. Ella furniss 145 uras gigawatt energia.