Il Cussegl federal ha approvà la mesemna in’ordinaziun che oblighescha ils veterinaris d’inditgar en in sistem d’infurmaziun mintga diever d’antibiotica.
Cun quella mesira, che va en vigur l'entschatta da l’auter onn, vul il Cussegl federal cumbatter las resistenzas. Adina pli savens datti numnadamain infecziuns cunter las qualas nagin antibiotic po pli gidar – quai tant tar ils animals sco er tar ils umans.
Finamira: Mantegnair l'effect da l'antibiotica
Cun il sistem d’infurmaziun nov vul la Confederaziun survegnir ina meglra survista tgenins animals che survegnan antibiotics, en tge sort da manaschi che quels animals vegnan tratgs e tgenins veterinaris che dovran e prescrivan quant savens antibiotica.
Uschia duajan vegnir chattads indizis schebain ils medicaments vegnan duvrads memia savens u a moda betg correcta.
RR novitads 12:00
