Siglir tar il cuntegn

Header

cuntegn

Svizra Nov schef per la Banca Raiffeisen

Heinz Huber che maina il mument la banca chantunala da la Turgovia surpiglia l'uffizi da CEO a partir dal schaner che vegn. Huber succeda cunquai a Patrik Gisel ch'era sa retratg l'entschatta da november.

Heinz Huber lavura dapi il 2007 en la Direcziun da la Banca Chantunala da la Turgovia e dapi il 2014 è el il CEO da la banca. Ses pensar dad interprendider e sia forza tar realisar las chaussas hajan persvadì il cussegl d’administraziun, ha communitgà la Raiffeisen.

Volver il dies al passà

Cun il CEO nov ed in cussegl d’administraziun nov vul la Raiffeisen trair in stritg sut il temp cun il CEO dispitaivel Pierin Vincenz. La radunanza da delegads aveva elegì ils 10 da november Guy Lachappelle, l’anteriur schef da la Banca Chantunala Basilaisa, sco nov president dal cussegl d’administraziun.

Conflict d'interess

Patrik Gisel ha stuì sa retrair perquai ch’ad el era vegnì renfatschà in conflict d’interess. I sa tracta da sia relaziun cun in’anteriura commembra dal cussegl d’administraziun da la Raiffeisen. Gisel sez aveva però ditg che la relaziun era naschida pir cura che sia partenaria aveva gia bandunà il gremi.

RR novitads 7:30+

Artitgels legids il pli savens