Siglir tar il cuntegn

Svizra Nov schef per Richemont

Jérôme Lambert daventa nov schef dal concern da products da luxus svizzer.

Schef da concern dad uras.
Legenda: Jérôme Lambert surpiglia a partir dad immediat la direcziun da Richemont (archiv). Keystone

Jérôme Lambert surpiglia a partir dad immediat la direcziun da Richemont. Quai ha communitgà il concern da bischutaria ed uras da luxus. Suenter che l'anteriur schef Richard Lepeu ha bandunà l'avrigl 2017 la firma, ha lezza desistì da remplazzar el ed ha repartì la responsabladad sin diversas persunas. Dapi radund in onn è Lambert responsabel per la fatschenta operativa. Avant era el il schef da Montblanc che tutga er al concern da Richemont. Dasper Montblanc tutga tranter auter er Cartier, Piaget e Baume & Mercier al concern.

Dapli svieuta

Ils emprims tschintg mais da l'onn da gestiun (fin la fin d'avust) è la svieuta s'augmentada per 22% sin 5,7 milliardas euros, sco quai che Richemont ha communitgà vinavant. Cunzunt saja la dumonda stada gronda en l'Asia ed en l'America dal Nord e dal Sid. Ultra da quai ha Richemont rinforzà sia vendita online cun acquistar il portal online talian Yoox Net-a-Porter (YNAP) sco er la plattafurma dad uras britannica Watchfinder.

RR novitads 10:00