Jon Fanzun è davent dal prim da schaner da l'onn proxim il nov secretari general da la PLD Svizra. La conferenza dals presidents e las presidentas ha elegì unanimamain l'Engiadinais sco successur da Fanny Noghero, rapporta l'agentura da novitads Keystone SDA. Noghero aveva abditgà suenter la demissiun da l'anteriura presidenta da la PLD Svizra Petra Gössi.
Il secretari general è in zic il cor da la partida.
Jon Fanzun ha 51 onns, è oriund da Tarasp ed abitescha a Berna. El ha gia 20 onns experientscha en la politica naziunala ed internaziunala. Tar la PLD è el stà secretari politic e secretari da la fracziun ed el è era stà collavuratur persunal dals cussegliers federals Didier Burkhalter ed Ignazio Cassis.
Jau m'allegr il pli fitg da viagiar tras la Svizra ed emprender d'enconuscher tut las partidas chantunalas anc meglier.
Actualmain lavurà el sco delegà spezial per dumondas da cyber tar la Confederaziun. Jobs impurtants e cun prestige, dentant la pussanza n'haja mai interessà el. La lavur saja quai che fascineschia el. Ed el saja plitost quel che stettia davos las culissas. Tuttina saja el in che haja er gugent sfidas. Quella ha el chattà sco secretari general da la PLD. La partida che perda tenor ina retschertga intermediara da Sotomo il pli fetg tar las proximas elecziuns federalas, numnadamein 1,5 pertschient. Jon Fanzun crai dentant vid il success e quintar, quintia la finala il resultat tar las elecziuns en dus onns.