A Prag èn sa radunads gievgia 44 stadis europeics ad in emprim inscunter suprem da la nova Communitad politica europeica. Sper ils commembers da l'UE eran er preschents stadis che n'èn betg en l'UE sco la Svizra e la Gronda Britannia.
Lantschà l'iniziativa per questa nova Communitad europeica ha il president franzos Emmanuel Macron. L'inscunter duai esser in segn d'unitad europeic en vista da la guerra en l'Ucraina e sias consequenzas. La Russia n'è perquai betg stada envidada.
La Svizra è stada represchentada cun il president da la Confederaziun Ignazio Cassis. Ils pajas da l'Europa hajan dà in cler signal cun lur inscunter, l'inscunter saja in schanza per dialog e collavuraziun en Europa, uschia Cassis.
Temas da l'inscunter èn tranter auter stads la mancanza d'energia, la situaziun economica e la guerra en l'Ucraina. Resultads concrets n'hai betg dà. En avegnir duai dar in inscunter da la nova Communitad europeica ina fin dus giadas l'onn.
