Siglir tar il cuntegn

Svizra Nova gasetta per la regiun See-Gaster

Somedia e Tamedia lantschan a partir dal 1. d'october ina nova gasetta per la regiun dal Lai Rivaun fin la regiun sura dal Lai da Turitg. La nova gasetta porta il titel Linth-Zeitung.

Nova gasetta, part da la pagina davant.
Legenda: Somedia e Tamedia fundeschan nova gasetta per la regiun See-Gaster. MAD

Las chasas edituras Somedia e Tamedia mettan ensemen duas da lur gasettas regiunalas, ed edeschan la nova Linth-Zeitung. Quella cuvra la regiun See-Gaster en il chantun Son Gagl. Sco quai che las duas interpresas communitgeschan, saja la nova gasetta in fusiun da l'ediziun Obersee da la Zürichsee-Zeitung e da l'ediziun Gaster&See da la Südostschweiz.

L'emprima ediziun cumpara il 1. d'october. Schurnalistas e schurnalists da las redacziuns actualas lavurian per la nova redacziun independenta da la Linth-Zeitung. Editura da la Linth-Zeitung è ina societad affiliada da las chasas edituras Somedia e Tamedia. Somedia posseda 51% da la nova societad.

Las gasettas Obersee e See&Gaster cumparan ils 29 da settember l'ultima giada. Davent dal 1. d'october survegnan ils lecturs da questas gasettas automaticamain la Linth-Zeitung, che vegn a cumparair en in'ediziun da 10'000.

RR novitads 12:00