Per cuntanscher sias finamiras dal clima vul il Cussegl federal reducir las emissiuns da CO2 per 50% enfin il 2030 cumpareglià cun il 1990. Perquai ha il Cussegl federal preschentà ina nova lescha per il temp tranter 2025 e 2030. L'ultima versiun da la lescha CO2 era vegnida refusada a l'urna en il 2021. Cun la nova versiun haja il Cussegl federal registrà las resalvas envers la veglia versiun. Novas taxas u in augment da las taxas existentas n'èn betg previsas.
Dapli energia svizra e regenerabla
En il center èn mesiras che duajan animar la populaziun da reducir las emissiuns da CO2. Sco la ministra da l'ambient Simonetta Sommaragua ha declerà ad ina conferenza da pressa, saja necessari da producir dapli energia Svizra. Cun quai e cun dapli energia regenerabla vegnia er reducida la dependenza dad ieli e gas.
