A partir da l'onn nov augmenta la posta suenter 18 onns las taxas per brevs: posta-A dad 1 franc sin 1.10 francs, posta-B dad 85 raps sin 90 raps. Las marcas cun la taxa veglia pon ins duvrar enavant, davent da l'entschatta dal 2022 ston ins simplamain cumplettar la francatura cun uschenumnadas «marcas da cumplettaziun». Marcas da 10 raps per cumplettar las marcas veglias dad 1 franc da posta-A sin la nova taxa datti gia tar la posta. Per pudair duvrar vinavant las marcas da posta-B dad 85 raps sto la posta ussa stampar novas marcas da tschintg raps. Quellas haja dà l'ultima gia l'onn 1986, pia avant 35 onns.
Bainprest al spurtegl
Sin las novas, uschenumnadas «marcas da cumplettaziun» èn maletgs da munaida en la valur da la marca – sin la marca da tschintg raps pia in da tschintg. I dat marcas da tschintg, diesch e ventg raps.
Davent da glindesdi, ils 13 da december 2021 pon ins empustar las marcas en il shop online da la posta. Tramess a chasa vegnan las marcas fin ils 27 da december 2021. Al spurtegl da la posta pon ins cumprar las marcas da tschintg raps a partir dals 20 da december 2021. Er gia en stampa èn las marcas cun la nova taxa da posta-A e posta-B cun valur da 1.10 francs e 90 raps. Sin las novas marcas èsi da vesair differentas cuntradas fluvialas. Er las marcas cun las novas taxas èn disponiblas en tuttas filialas da la posta a partir dal 20 da december 2021.