Iniziant è cun Corsin Derungs in Sursilvan che abita gia dapi radund 50 onns en la Bassa. Uniuns Rumantschas en la Bassa, datti bain gia intgina? Gea, di era Corsin Derungs. Las bleras uniuns organiseschian dentant spezialmain occurenzas per las Rumantschas ed ils Rumantschs en la diaspora e betg per l'entira populaziun. Ed el agiunta: «Jau sun ina persuna che siemia er gugent». Sia visiun saja d'organisar sairas da cultura rumantschas en l'entira Svizra. Quai na stoppia betg mo esser en la Svizra tudestga, mabain er en la Romandie per exempel.
I dat massa «betg-Rumantschs» che taidlan gugent la cultura rumantscha.
Emprima saira culturala a Cham ZG
Anc stat l'uniun ch'è vegnida fundada il november passà al cumenzament. Ils 22'avrigl vegn organisà in'emprima occurenza per tut ils interessads vi da la cultura rumantscha. A Cham en il chantun Zug vegn organisà in concert cun cant dal Cantus Firmus Surselva, il chor Ligia Grischa ed il chor grischun da giuvenils. Suenter questa premiera vegn guardà vinavant, raquinta Corsin Derungs. En il futur na veglian els dentant betg mo dar la pussaivladad a chors da sa preschentar, mabain er ad auters artists ed artistas rumantschas.
Il Sursilvans è persvas ch'ins sa promover anc pli fitg il rumantsch en la Bassa e purtar ella pli datiers a persunas che n'enconuschan anc betg uschè bain ella.