Siglir tar il cuntegn

Header

cuntegn

Nova varianta dal virus Naginas controllas spezialas a l'eroport da Turitg

A l’eroport da Turitg na datti en il mument naginas controllas spezialas pervia da la nova varianta dal coronavirus, omicron. La sonda bun’ura è arrivà in’aviun or da l’Africa dal Sid. Tenor differents rapports da medias na sajan ils passagiers betg vegnids contactads entras las autoritads.

Las instrucziuns na sajan betg stadas cleras. L'Uffizi federal da la sanadad ha dentant communitgà, che tut ils passagiers vegnian contactads via SMS ed ordinads dad ir en quarantina e da sa laschar testar immediat sin il coronavirus. Medemamain vegnian las infurmaziuns dals passagiers tramess als chantuns per che quels possian surprender la controlla dals tests e da la quarantina. Tests positivs vegnian intercurrids en detail e sequenziads.

Pervi da la nova varianta dal coronavirus ha la Confederaziun scumandà tut ils sgols directs da la regiun da l'Africa dal Sid, quai ha communitgà il venderdi l'Uffizi federal da sanadad, BAG. Uschia veglian ins impedir che la nova varianta dal coronavirus sa derasa en la Svizra u almain betg usché spert. Da nov ston persunas che turnan da l'Africa dal Sid, da Hongkong, da l'Israel e da la Belgia mussar in test da Covid-19 negativ ed ir per 10 dis en quarantina. En la Belgia han ins registrà l'emprim cas confermà da la nova varianta en l'Europa, ha communitgà il minister da sanadad da la Belgia.

Plirs pajais han decis da restrenscher l’entrada en il pajais per tgi che vegn da la regiun dal sid da l'Africa.

  • La Frantscha scumonda per almain 48 uras ad aviuns ord il sid da l'Africa da sa tschentar. Quai vala per l'Africa dal Sid, Lesotho, Botsuana Simbabwe, Mosambik, Namibia ed Eswatini.
  • La Gronda Britannia limitescha d'entrar da l'Africa dal Sid e plirs stadis vischins.
  • Israel, l'India ed il Giapun han annunzià pli rigurusas controllas per persunas che vegnan ord tscherts pajais en il sid da l'Africa.
  • Il Pajais Bass scumonda sgols ord l'Africa dal Sid.
  • L'Italia na lascha betg entrar persunas ch'èn stadas ils davos 14 dis en il sid da l'Africa. La Tschechia ha annunzià da vulair far il medem.

Betg prender mesiras memia spert

L'Organisaziun mundiala da la sanadad WHO appellescha da sa retegnair cun quellas mesiras. Ins na dastgia betg prender mesiras memia svelt, ha in pledader ditg. I dovria pliras emnas d'intercurir co ch'ils vaccins reageschian sin la nova varianta e co quella sa derasia. La WHO vul decider anc oz co i saja da valitar la nova varianta dal coronavirus.

Da l'autra vart pretenda l'Organisaziun mundiala per il turissem da decider restricziuns da viadi svelt ed unitar. Tenor il secretari general Surab Pololikaschwili duess ins il meglier decider oz e betg per en in'emna, uschiglio possia esser memia tard.

audio
Per tadlar: Las novitads da las 15:00
aus RTR Audio vom 26.11.2021.
abspielen. Laufzeit 2 minutas 33 Sekunden.

RTR novitads 14:00

Artitgels legids il pli savens

Scrollar a sanestra Scrollar a dretga