En Svizra han ins chattà fin uss 4'411 cas da variantas mutadas dal coronavirus, radund 60% dapli ch'avant in'emna. Ils epidemiologs quintan entant ch'ina cumpart da 30 fin 40% da las infecziuns da corona èn mutaziuns. Tenor indicaziuns dal BAG sa tractia tar 1692 cas da la mutaziun britannica, tar 69 cas da la mutaziun sidafricana e tar passa 2'650 cas saja avant maun ina mutaziun, dentant na saja la lingia betg clera.
Adina dapli cas da mutaziun
Era sch'il dumber da novas infecziuns cun il coronavirus van enavos, sa dublegian las infecziuns cun il virus mutà da la Gronda Britannia mintga 10 dis. Sco il schef da la task-force, Martin Ackermann, ha declerà il mardi a Berna davant las medias, vegn stimà che radund 20% dals cas actuals pertutgan la mutaziun britannica B.1.1.7. Il dumber da novas infecziuns stoppia uss vinavant ir enavos. Perquai che la varianta britannica saja pli contagiusa, pudess la Svizra uschiglio svelt puspè vegnir als cunfins.
Emprim cas da mutaziun brasiliana
Il glindesdi saja l'Uffizi federal da sanadad vegnì infurmà l'emprima giada davart in cas cun la mutaziun brasiliana en Svizra, ha ditg Virginie Masserey dal BAG il mardi a Berna. Ins saja actualmain londervi dad examinar, co che quel virus saja vegnì en Svizra. Tenor las enconuschientschas actualas è quella varianta dal virus pli contagiusa. Er persunas ch'èn gia stadas infectadas cun il virus originar, pon s'infectar da nov.
