Il glindesdi annunzia il BAG 822 ulteriurs novs cas confermads – quai per las ultimas 72 uras. La media da set dis è cun quai creschida per il dubel, cumpareglià cun l'emna avant, sco SRF Data ha calculà. En pli annunzia il BAG dus ulteriurs mortoris.
Il chantun Grischun annunzia quatter ulteriurs cas confermads, aifer in di.
Duas persunas vegnan tgiradas en l'ospital pervi da corona, però nagina sin la staziun intensiva.
22% da las Tessinaisas e dals Tessinais han anticorpuls
En il chantun Tessin ha in zic dapli che mintga tschintgavla persuna gì contact cun il coronavirus, quai dapi che la pandemia è rutta or. Quai mussan ils resultats d'in grond studi en il Tessin, che la regenza ha preschentà. Tenor il studi han 22% da las persunas testadas anticorpuls en il sang. Tar l'emprima enquista il matg avant in onn eran quai sulettamain 9%, il november 2020 eran quai 14%.
In onn pli tard anc anticorpuls en il sang
Sper quai ha il studi constatà che bun 62% da las persunas testadas hajan er 12 mais suenter in'infecziun anc anticorpuls dal coronavirus en il sang. Quai muntia dentant betg che quellas persunas sajan protegidas d'ina ulteriura infecziun. Differenzas pertutgant la vegliadetgna ed ils anticorpuls n'ha il studi betg constatà grondas. Er tar persunas sur 80 onns hajan ins chattà anticorpuls en il sang 12 mais suenter in contact cun il virus. Probabel vegnia cuntinuà cun il studi en il Tessin. El saja d'impurtanza per far in purtet davart l'immunitad, ha infurmà il medi chantunal dal Tessin. Al studi han passa 900 persunas fatg part.
