Quant bler daners èn el gieu en il cumbat electoral en il Grischun? Dapi quest onn ston donaziuns en la politica vegnir annunziadas sut tschertas cundiziuns. Quai pertutga er candidaturas en il Grischun. Differentas summas èn nudadas da la controlla federala da finanzas:
- Magdalena Martullo-Blocher ha 150'000 francs a disposiziun per il cumbat electoral.
- L'Allianza dal Center grischuna dispona da radund 160'000 francs. Il cusseglier naziunal Martin Candinas ha donà 20'000 francs a la partida.
- La Partida socialdemocratica grischuna dispona da 131'000 francs.
- La Partida liberaldemocratica grischuna dispona 103'000 francs.
Ils daners da las partidas chantunalas vegnian mintgamai da bun a las candidaturas per il Cussegl naziunal e Cussegl dals chantuns.
Survista sur las partidas
I restan dentant largias, betg tuttas donaziuns ston vegnir annunziadas. Per exempel restan portas avertas da zuppentar donaziuns sur fundaziuns. Plinavant ston donaziuns sut 15'000 francs e campagnas sut 50'000 francs betg vegnir annunziadas.
Las pli charas campagnas e las pli grondas donaziuns
Il pli bler dat Donat Scognamiglio or per ses cumbat per il Cussegl naziunal a Turitg (365'000 francs, PEV), sco segund suonda Andri Silberschmidt (280'000 francs, PLD, er Turitg). La pli gronda donatura è Carmita Burkard (703'000 francs per la Verda) e sco segund suonda Christoph Blocher (550'000 francs per la PPS).
Da las 12,4 milliuns dal budget da la PLD vegnan 2,8 milliuns francs da bun a campagnas sin nivel naziunal, 4,8 milliuns francs a campagnas sin nivel chantunal. 2,17 milliuns francs dat la partida or per campagnas da singulas persunas.
Il register da donaziuns da la controlla federala da finanzas cumpiglia er ils budgets d'organisaziuns betg politicas. Uschia dat la cuminanza d'interess da las uniuns d'economia ora 2,2 milliuns francs e Greenpeace Svizra per exempel 220'000 francs.