Siglir tar il cuntegn

Header

cuntegn

Svizra Novas structuras da tariffa pils fisioterapeuts

L'uniun d'ospitals H+ e l'uniun da cassas da malsauns Curafutura han inoltrà ina proposta per novas tariffas tar la confedaraziun. Quai han las duas uniuns communitgà glindesdi.

L'uniun d'ospitals H+ e l'uniun da cassas da malsauns Curafutura han inoltrà la dumonda cun reglamentaziuns da contract e cunvegna d'unificaziun. Las normas per ils contracts sajan vegnidas elavuradas ils davos mais ed approvads da las duas uniuns.

Las novas tariffas duain remplazzar las structuras da tariffas existentas che valan enfin la fin da settember 2016. La nova tariffa «Physio-Tarmed» duai ir en vigur a partir dal 1. da schaner 2017. Fin là duai la structura da tariffas veglia restar en funcziun.

I va per modernisar e simplifitgar

«Objectivas ed economicas» sajan las novas tariffas tenor las duas uniuns. La structura veglia na cuvria betg pli las prestaziuns da la fisioterapia ambulanta e sajan antiquadas. Era en la fisioterapia haja dà svilups medicinals sco era professiunals e la situaziun dals pazients saja era daventada pli cumplexa.

Tenor Curafutura e H+ saja la proposta, inoltrada tar l'uffizi da sanadad federal, pli simpla che la veglia. Las normas per ils contracts sajan partidas en auter e cumponidas pli simplas

Sin la davosa minuta

Il minister da sanadad, Alain Berset aveva lubì l'entschatta zercladur ina davosa prolungaziun da termin als partenaris da Tarmed ch'èn en discordia, per s'accordar per ina refurma dil sistem da tariffas. Uschiglio pudess Berset definitivamain declerar il naufragi per il sistem da Tarmed ed il cussegl federal pudess perscriver las tariffas.

RR novitads 15:00

Artitgels legids il pli savens