Tenor l'expert d'aviatica da l'ETH Losanna ed anteriur pilot da militar ed astronaut Claude Nicollier duai il Cussegl federal cumprar dapli ch'ils 30 aviuns planisads. El preferiss enturn 40 aviuns. Pel mument haja l'armada 30 aviuns da cumbat F/A 18 – quai na bastia dentant betg. Daplirs aviuns custassan dentant era ina milliarda francs dapli.
La cussegliera federala Viola Amherd na vul atgnamain betg auzar il budget. Midadas en las prioritad sajan dentant anc pussaivlas. Vul dir: L'armada pudess cumprar dapli aviuns, dentant investir pli pauc en il sistem da defensiun da l'aria.
Sur da tge votar?
Plinavant cusseglia Nicollier da laschar votar il pievel davart ils aviuns da cumbat, dentant betg davart las rachetas da defensiun en l’aria. El sustegna dentant l'idea da la regenza da decider pir suenter questa votaziun davart il tip d'aviun che duai vegnir cumprà. Il mument è l'armada vidlonder da testar tschintg differents models d'aviuns da cumbat a Payern en il chantun Vad.
L'idea da Nicollier na correspunda però betg als plans dal Cussegl federal. Quel vuless metter ils jets da cumbat e las rachetas en in unic pachet e suttametter quel al Parlament federal ed uschia dar la pussaivladad als adversaris da la cumpra da prender il referendum.
Betg cumpensar 100 pertschient
In segund rapport ha prendì sut la marella las fatschentas en cuntrapart che vegnan fatgas a chaschun da talas cumpras. Il Cussegl federal ha annunzià da vulair cumpensar 100 pertschient da la summa da cumpra per ils novs aviuns da cumbat. Tenor Kurt Grüter, l’anteriur directur da la Controlla federala da finanzas ed autur da quest rapport, na fetschia quai betg senn da vulair cumpensar cumplainamain ils custs da la cumpra dals aviuns da cumbat. Il volumen da 6 enfin 7 milliardas francs saja simplamain memia gronds. Pli realistic saja da prender en mira cumpensaziuns directas da 20 pertschient e fatschentas en cuntrapart da ulteriurs 40 pertschient da las qualas interpresas en ils secturs da la segirtad e da la tecnologia possian profitar.
Co vinavant?
Il Cussegl federal vegn ussa anc ina giada a sa fatschentar cun l'entir project. Viola Amherd ha annunzià da preschentar prest ina proposta a ses collegas. Las recumandaziuns da Claude Nicollier vul ella resguardar tant sco pussibel.
Damai che la cumpra da novs aviuns da cumbat fa prescha spera Amherd ch'il Cussegl federal possia anc decider avant las vacanzas da stad en chaussa.
Finamira saja che las Svizras ed ils Svizzers possian decider l'auter onn, u la fin da settember ni la fin da november, davart la dumonda da principi sche la Svizra duai era il futur avair aviuns da cumbat.
RR novitads 08:30
