Dapi la fin da l'onn passà è la cunvegna da basa cun l'Uniun europeica sin maisa e quai suenter nov mais da tractativas e circa 200 sesidas. La cunvegna duai reglar la relaziun tranter la Svizra e l'Uniun europeica. Ella cumpiglia en tut 750 paginas e be paucas persunas han enfin uss dastgà dar in'egliada en ils documents.
Las opiniuns èn gia cleras
Sulettamain duas persunas da mintga partida han dastgà prender invista en ils documents da contract. Ina dad ellas è la cussegliera naziunala Magdalena Martullo-Blocher da la PPS. Ella ha legì ensemen cun ses collega da partida Thomas Aeschi ils novs contracts. Suenter duas uras e mez sajan els stads persvas ch'ils contracts n'èn betg buns per la Svizra.
Nus essan gia fundamentalmain encunter, perquai che nus na pudain betg pli decider sezs davart nossas leschas.
Era Jon Pult, cusseglier naziunal da la PS, ha ina clera opiniun pertutgant ils novs contracts. Era sch'el n'ha anc betg pudì leger ils documents, di el che quels èn buns per la Svizra. Ils dus cussegliers naziunals han ad ina discussiun da podium a Cuira debattà davart ils novs contracts. Las opiniuns èn las opiniuns usitadas da las partidas. Per la PS èn ils contracts buns e necessaris.
Gist en quest mund adina pli privlus e cumplitgà èsi fundamental d'avair relaziuns cleras e bunas cun noss vischins, cun l'Uniun europeica. Perquai èsi cler che jau vi ina buna soluziun per quests contracts.
Ils contracts vegnan publitgads il zercladur 2025 per tut las persunas interessadas.
