Datti raps dal Chantun Grischun per isl donns da la schelira vi da vignas e pumers?
Quai è stada ina dumonda omnipreschenta suenter las notgs da schelada durant l’avrigl passà. Peril Chantun ha reagì il Cusseglier guvernativ responsabel Jon Domenic Parolini sin questa dumonda cun in «ni gea, ni na».
Parolini vul numnadamain anc spetgar sin las examinaziuns exacatas da las vignas grischunas. Questas examinaziuns èn dentant pir pussaivlas l'atun u schizunt l'enviern proxim.
Uss infurmescha la Confederaziun davart agid pussaivel
Tar la Confederaziun datti gia pussaivladads per survegnir sustegn finanzial en talas situaziuns – e quai betg be per donns da schelira. Sch'in manaschi puril ha problems finanzials, ha el numnadamain trais pussaivladads per survegnir sustegn da la Confederaziun:
- Interrumper per in onn l’amortisaziun da tschains da credits d’investiziun ed emprests a manaschis.
- In emprest finanzial senza tschains, ch’è da pajar enavos suenter maximalmain 20 onns.
- Credits d’investiziun senza tschains per remplazzar culturas donnegiadas.
Per pudair retrair in da quests sustegns finanzials, sto il manaschi puril inoltrar ina dumonda al chantun meglier detg al Plantahof.
En Grischun porscha il Plantahof sustegn tar dumondas
Il Plantahof examinescha alura la dumonda tenor criteris da la Confederaziun e dat daners ni era betg. Ils daners vegnan alura ord d'in fond existent da la Confederaziun – numnadamain or dal fond d’agid per manaschis. Per quest onn prevesa quel expensas da 50 milliuns francs.
RR actualitad 07:00