Per preschentar sias ideas co che l'armada svizra duai sa sviluppar ha il cusseglier federal Martin Pfister elegì la plazza d'armas a Bure en il chantun Giura. Normalmain sa preschentan nov elegids cussegliers federals pir suenter 100 dis en uffizi davant las medias. Pfister ha fatg quai gia suenter circa la mesadad dal temp. El sentia en la situaziun da segirezza actuala las spetgas da la politica e da la publicitad da sa posiziunar, ha el manegià.
La segirtad dal pajais e da l'Europa saja uschè periclitada sco dapi onns betg pli. Attatgas sco spiunascha, smanatschas or dal cyber ed activitads per influenzar dettia gia. E quellas pudessian en il proxim temp survegnir dimensiuns bler pli massivas. Martin Pfister na vul era betg laschar da la vart la cooperaziun internaziunala.
I spetgan decisiuns da persunal impurtantas
La Svizra stoppia perquai prender sia segirezza en ses agens mauns, e nizzegiar tut las ressursas che stettian a disposiziun. Cunquai ch'il Parlament federal ha decidì d'augmentar il budget da l'armada sin 1 pertschient dal product naziunal brut fin il 2032, saja in impurtant pass gia fatg per rinforzar l'abilitad da sa defender. I dovria dentant era eventualas adattaziuns da las structuras. Perquai succedia actualmain in'examinaziun da la structura da manar da l'armada.
Vitiers vai era per remplazzar il schef da l'armada Thomas Süssli ed il schef dal servetsch d'infurmaziun Christian Dussey che sa retiran. Tgi che succeda a Dussey duai esser cler suenter las vacanzas da stad, ha Pfister ditg sin dumonda d'in schurnalist. E fin la fin da l'onn saja speranza era la successiun da Süssli reglada, e tut las roschadas en l'armada che pudessian esser necessarias en quest process.
Promover la confidenza
Auters termins che Martin Pfister ha menziunà èn la strategia davart l'armament che duai esser sin maisa fin mez da l'onn, e la consultaziun davart la strategia da la politica da segirezza che quai cumenzar anc quest onn. E la transfurmaziun dal Servetsch d'infurmaziun da la Confederaziun duai esser terminada la fin dal 2026.
Per meglierar la confidenza en il departament da defensiun VBS vul Martin Pfister tranter auter laschar controllar meglier ils divers projects e programs. Tar pliras fatschentas è il departament stà confruntà il davos temp cun pannas e cun retards. Uss ha il nov minister da defensiun creà la partiziun «Planisaziun, controlling, digitalisaziun e segirezza», cun Robert Scheidegger al timun.