Ch'igl ha dà in tal augment da tissientadas pervi da bulieus, saja cunzunt d'attribuir al fatg ch'i saja stà in bun onn da bulieus. Cumpareglià cun ils ultims 20 onns, saja quai l'onn cun las pli bleras cussegliaziuns, cun excepziun dal 2019.
Il dumber da telefons pervi da tissientadas chaschunadas per accident è creschì per radund 3%. Percunter èn ils telefons pervi dad emprovas da suicidi sa reducids per 4%. Total hai dà pervi da quai 4'486 telefons. L'onn 2021, durant la pandemia da corona era quest dumber s'augmentà marcantamain tar giuvenils.
2,5% dapli telefons
Cumpareglià cun l'onn 2021 hai dà 2,5% dapli telefons tar il numer 145. Tissientadas cun medicaments e products dal tegnairchasa capitian il pli savens. 9% dapli hai dà pervi da plantas ed 11% dapli pervi da nutriment u bavrondas.
Sco mintga onn hajan radund 40% dals telefons pertutgà uffants pitschens che na van anc betg a scola, il pli savens sa tractia qua dad accidents. Tar giuvenils, ch'èn responsabels per radund 10% dals telefons, stattan dentant tissientadas intenziunadas en il center. Sur tut emprovas da suicidi, ma ina pitschna part er abus da substanzas.
En tut ha Tox Info Suisse fatg l'onn passà 40'582 cussegliaziuns pervi da tissientadas. Il numer è cuntanschibel l'entir onn e 24 uras a di. Ella stat a disposiziun a laics ed a persunas dal fatg.
