Siglir tar il cuntegn
cuntegn

Svizra Obligatori da dossiers electronics è fixà

Ospitals e chasas da tgira ston porscher dossiers da pazients electronics. Il Cussegl naziunal ha eliminà las davosas differenzas cun il Cussegl dals chantuns.

Ina dunna sfuglia tras dossiers da palpiri.
Legenda: Ils pazients pon era vinavant sa decider per il model tradiziunal dal dossier da palpiri. Keystone

L’obligatori da porscher dossiers da pazients electronics vegn introducì per ospitals e chasas da tgira. Il prim vuleva il Cussegl naziunal ch'ils dossiers electronics sajan era obligatorics per servetschs ambulants sco medis, apotechers, spendreras e chiropratichers. Uss ha el decidì da desister da quai. Ils medis avevan smanatschà cun in referendum en cas ch'i fiss vegnì introducì in obligatori.

Per pazients resta il dossier electronic en mintga cas voluntari. Sulettamain els decidan, schebain els vulan in dossier electronic u betg.

Augmentar qualitad dals tractaments

Il dossier da pazients electronic duai gidar a far pli segirs ils tractaments e d’augmentar la qualitad da la tgira. Sch’il medi enconuscha l’entir rapport medicinal d’in pazient, lura pon examinaziuns dublas e sbagls vegnir evitads.

Datas da pazients restan anonimas

Suenter ch’il Cussegl federal aveva gì dubis pertutgant ils dossiers electronics ha el fatg in pèr midadas. Tar questas tutga era la segirtad da datas. La lescha federala davart ils dossiers da pazients electronics prevesa uss in numer d’identificaziun spezial enstagl dal numer da la AVS. Ultra da quai na vegnan las datas betg arcunadas en ina banca da datas centrala, ma vegnan plazzadas externamain.

RR novitads 12:00

Temp da realisaziun

Ils ospitals èn obligads da realisar las decisiuns dals cussegls aifer 3 onns suenter l’entrada en vigur da la lescha. Chasas da tgira e da parturir percunter han temp 5 onns per la midada.