- La Banca naziunala svizra dovra in nov schef suenter ch'il president d'enfin qua, Thomas Jordan, ha annunzià sia demissiun.
- Persunas dal fatg da l'observatori da la BNS (gremi da trais experts) pretendan ch'en l'avegnir duessan dapli persunas esser da la partida tar decisiuns impurtantas.
- Tenor l'observatori avess insatgi d'ordaifer da la Banca naziunala svizra d'entrar en la successiun da Jordan per purtar novas ideas.
Suenter ch'il president dal directori da la Banca naziunala svizra Thomas Jordan ha annunzià sia demissiun, dovra la banca naziunala in nov schef. Thomas Jordan ha survegnì bler laud per ses cumbat cunter l'inflaziun e per pretschs stabils. Er da Yvan Lengwiler da l'observatori da la BNS. «Sco politicher monetar ha el fatg in fitg bun job», di il professer d'economia da l'Universitad da Basilea. Tuttina sajan refurmas necessarias per che la BNS funcziunia bain era senza Thomas Jordan – ed era per far anc meglra la direcziun da la banca naziunala.
Uschia pretendan ils trais economs da renum da l'observatori independent da la banca naziunala, tar ils quals Lengwiler tutga sez, per exempel che dapli persunas stuessan dar pled e fatg en cas da decisiuns impurtantas.
Pia, sch'i va per ils tschains da la BNS u per il curs dal franc. Actualmain ha il directori trais commembers che vegnan nominads mintgamai uffizialmain dal Cussegl federal. «Las decisiuns da la Banca naziunala pertutgan mintga burgaisa e mintga burgais direct. Là duessi simplamain dar in sustegn pli vast», di Lengwiler vinavant.
Il chapital per la distribuziun a la Confederaziun ed als chantuns fiss avant maun
Pli ditg che da chattar ina successiun per Jordan dastgassia durar tar la dumonda, quant gudogn che la Banca naziunala duai distribuir onn per onn a la generalitad. L’observatori di: Era sche la Banca naziunala scrivia sperditas – sco ils ultims dus onns – possia ella furnir gudogns dal temp avant als chantuns ed a la Confederaziun. «Igl è senz’auter chapital ch’ella pudess distribuir. Ella na vul simplamain betg distribuir el», di Lengwiler.
Dentant san ils enconuschiders en l'observatori che la banca naziunala ha fatg ina cunvegna cun la Confederaziun per la distribuziun dal gudogn che vala enfin il 2025. En quest rom existent dat la BNS adatg ch’ella ha avunda reservas. Perquai na datti quest onn danovamain nagins daners da la banca naziunala per la Confederaziun ed ils chantuns.
Sche la banca mida sut ina nova direcziun sia politica, è avert. Er las ulteriuras propostas da refurma da l'observatori na dastgass la BNS strusch realisar simplamain mo uschia. Ed ella na commentescha er betg sin dumonda l'ultim rapport dals trais spezialists independents.
