Siglir tar il cuntegn

Header

In dissegn cu colur d'ieli d'in pèr.
Legenda: Giuven u vegl, be ensemen: Ina gronda part da las Svizras e dals Svizzers viva en ina relaziun. Pixabay
cuntegn

Svizra Oh l'amur - partenadis e lètg èn populars

En Svizra vivan bun trais quarts dals umens e da las dunnas tranter 18 e 80 onns en ina relaziun. La gronda part viva er ensemen cun il partenari u la partenaria. Vinavant fitg derasada è la lètg.

Quatter tschitgavels da tut las persunas che vivan ensemen cun in partenari da l'autra schlattaina èn maridads. Pèrs cun uffants èn savens maridads. Be 5 pertschient dals partenadis cun uffants n'èn betg maridads. Quai resulta da l'enquista da l'Uffizi federal da statistica.

Medem s’accorda gugent

Tar la maioritad dals pèrs, tar ils quals omadus partenaris èn sur 25 onns u pli vegls, è l’um almain dus onns pli vegls che la dunna. Tuttina èn ils partenaris da trais da diesch pèrs bunamain tuttina vegls (+/- 1 onn). Per regla è la differenza da vegliadetgna relativamain pitschna.

In’autr’accordanza è da chattar areguard la furmaziun. En sis da diesch cas han omadus partenaris il medem nivel da furmaziun. Ils ultims onns hai dà in augment da pèrs nua che la dunna ha in pli aut nivel da furmaziun.

Amur giuvenila senza convivenza

En Svizra vivan radund 15 pertschient da las dunnas e dals umens tranter 18 ed 80 onns en in partenadi, dentant en abitaziuns separadas.

Questa furma da relaziun è cunzunt derasada tranter giuvens pèrs. Trais quarts dals partenaris tranter 18 e 24 onns n’abiteschan betg ensemen. La raschun principala per abitaziuns separadas è il giavisch da mantegnair l’independenza.

Tgi decida en tegnairchasa da pèrs?

Davart cumpras extraordinarias, vita sociala ed activitads dal temp liber decidan omadus partenaris per regla tuttina savens. In’excepziun datti tar las cumpras dal mintgadi, tar las qualas la dunna decida il pli savens tar bun la mesadad dals pèrs.

La repartiziun da las rollas aifer il partenadi è dependenta dal fatg, sch’uffants vivan en il tegnairchasa. Tar 61 pertschient dals pèrs tranter 25 e 54 onns decida oravant tut la dunna sur da cumpras dal mintgadi. Tar pèrs senz’uffants munta questa cumpart be a 36 pertschient.

cdm/alb

Artitgels legì il pli savens

Nach links scrollen Nach rechts scrollen